موال .... نام ... يا حلمي *

حمودي الولهان الإثنين أبريل 21, 2008 1:40 am

موال في حُب الشقيانين
المطحونين المأسورين
اللي عايشين الليالي
والغموس دمع العينين
وآه ياعين ع اللي تايه من زمن
مأسور بصمت العاجز
والعجوز الوهن
متكتفه كل الخطاوي
والطريق بالزيف
وبكل أنواع الرياء
إندهن
.................................................
( 2 )
نام
نام ياضنايا
إرضع الصدر اللي مات
ارضع الصبر اللي عشش في الصدور
وارضع كمان حُب السُكات
وامضغ نعم وابلع نعم
اياك لسانك يخدعك
إياك ضميرك يوجعك
تبدل نعم وتقولها لا
وتعيش حياتك في الألم
يابني في زمن العدم
ال لأ تبقي مُحرمات
............................................( 3 )
يا حلمي

يا حلمي يا ميت
من غير كفن
مرمي علي الطرقات
برضه بتثير الصراع
بين الطيور الجارحه
وكلاب السكك
ومنتظر عابر سبيل
يايقومك
يايكفنك
طال الزمن
وعابر سبيلك مرمي جنبك ع الطريق
من غير كفن........................................